SJAREL EN BUNTER GAANS OONDEREIN!
Zoondeg 22 februari 2009, 2107 oor K 713
Gein Hoegmès in de bazzeliek gezoonge in ut Gregoriaans, gei Momuskanon opte Vriethof; gein brallende Tempeleere en ut umhoegriete vaan ut Mooswief, ouch neet de Mooswijfkes vaan Sint Pieter en de ierste veurziechtige verkleiders en ut opstèlle vaan d’n optoch in Wieck beij de stasie, boe heer um 14.11 oor miestal vertrèk. Niks vaan dat alles en hoewel ut miech noe allemaol sjèrrep in de memorie kuhump, iech höb ut heij in Praahaag gein sekond gemis.
Fotoos heijoonder: Iers de astronomische klok op ut stadhoes en daan de Tynkèrrek
Veer zien vemörrege um 7.00 opgestande, um 8.15 goon ete of eve euver achte, um 9.00 oor zaote veer in de bös en um half tien waore veer nao un korte roondrit door de boetewieke vaan P. aon de Ingelebrögk, boe de promenaad mèt Božena begòs. Ze heet us, unne groep vaan fieftig awwer luij, iers ut veurmaolig joeds getto laote zien, de z.g. Josefov mèt door d’n draod en aon de boetekant de veer aw sjoele, de kèrrekhoof en wat noe gewoorde is vaan 33 klein Stoksträötsjes in de aw stad vaan P. Prachtige breij straote vol rieke Jugendstil-hoezer vol prach en praol mèt heij en dao de Davidsster mèt in het midde de joedenhood, geel van kleur, want dat waor d’n tint vaan venien en verraod.
Daan door nao ut aait Stadsplein mèt achter de hoezereij de dominerende Mariakèrrek die ze ‘Tijnkerk’ numde, mèh die op ze Tsj. Tieien (lang ie) het nao de wiehiek boe-in ze ligk. De Nicolaaskèrrek in d’n aanderen hook vaan de Hussieten, modern, genump nao Jan Hus (Jaan Hoes), dee al in 14 zoeväöl verbrand woort es ketter In Constanz (Dld). Unnen ieuw ieder es Luther ging heer al tegen de vermolmde RK Kèrrek in. In de barokke Jaocobskèrrek koste veer d’n aofgeknepe deevenerrem neet vinde. Dao goon veer veur trök op dinsdeg.
Mèh ut hoegtepunt waor toch ut bezeuk aon ut Clementinum mèt un Tsjechische medam es gids. Deur (440 Ckr) mèh de meuite weerd. Dit Zjuzwietecollege, gestiech door Petr. Canisius nota bene, (± 1720) heet un Spiegelkapel vaan Maria-Boodschap mèt plafondfresco’s op de regels vaan ut Weesgegroet. Unnen orgel, boe dee jong vaan Mozart nog op gehings heet.
Fotoos: Bove e veurbeeld vaan de prachtige hoezer beij de sjoel en oonder un klok met Hebreeuwse letters die ouch aandersum löp.
Unne prachtige barokbiebzaol en unnen astronomischen tore boe Kepler,Corpernicus, Tycho Brahe en ouch Galileo Galilei nog heet (sic, lees höbbe) roondgerend. Bijna 200 trappe nao u prachtig oetziech euver P. Veer droonke met Božena koffie vlak tegeneuver de astronomische klok op ut aajt stadhoes vaan P. mèh dao voont iech geine bal aon. De Tynkèrrek wao touw en tössedoor voonte veer prachtige aw staminees veur get te ete of te drinke. Unne sjoenen daag, prachtig. Praag is e opelochmuzeum.
22.50 oor.
En noe höb iech nog ut sjoenste verhaol vaan ut Clementinum vergete en is ut miech opte badkamer (bad te kort, geine waterdrök op d’n doesjkop, baardkretser thoes laote ligke: ein en al elend, dus) (scil:)
BUNTER
Geen opmerkingen:
Een reactie posten